എഴുത്തുകാരൻ, നടൻ എന്നീ നിലകളിൽ പ്ര​ഗത്ഭനാണ് വികെ ശ്രീരാമൻ. സമൂഹമാധ്യമങ്ങളിൽ സജീവമായ അദ്ദേഹം തന്റെ വീട്ടിലെ മാലതി എന്ന മാൾട്ടിയെന്ന് വിളിപ്പേരുള്ള പട്ടിയെ വെച്ച് എഴുതുന്ന ആക്ഷേപ ഹാസ്യ പോസ്റ്റുകൾക്കെല്ലാം വലിയ സ്വീകാര്യതയുമാണ്. മലയാളത്തിലെ മിക്ക എഴുത്തുകാരുമായും നടൻമാരുമായും അടുത്ത ബന്ധമുള്ള ഇദ്ദേഹത്തിന് മമ്മൂട്ടിയുമായും മോഹൻലാലുമായും നല്ല ബന്ധമാണുള്ളത്. മലയാളത്തിന്റെ പ്രിയപ്പെട്ട മോഹൻലാലിനെയും മമ്മൂട്ടിയെയും കുറിച്ച് അദ്ദേഹം മുമ്പ് ഒരിക്കൽ പറഞ്ഞ കാര്യങ്ങളാണ് ഇപ്പോൾ വീണ്ടും ചർച്ചയാകുന്നത്.

മോഹൻലാലിനൊന്നും ഇല്ലാത്ത തരം ഒരു ജീവിതം മമ്മൂട്ടിക്കുണ്ട് എന്നായിരുന്നു മുൻപൊരിക്കൽ ദ മലബാർ ജേർണലിന് നൽകിയ അഭിമുഖത്തിൽ വി കെ ശ്രീരാമൻ പറഞ്ഞത്. സിനിമാ നടൻ എന്നതിനും അപ്പുറം തനിക്ക് ഒരു സാധാരണക്കാരനായി നടക്കാനായിരുന്നു ആഗ്രഹം എന്ന് വ്യക്തമാക്കവേയാണ് വി കെ ശ്രീരാമൻ മമ്മൂട്ടിയെ കുറിച്ചും പറഞ്ഞത്. സിനിമ എനിക്കൊരു ആത്മാവിഷ്‍കരമൊന്നുമായിരുന്നില്ല. എന്നിലുള്ള നടനെ പുറത്തെടുക്കാനുള്ള അവസരവുമായിരുന്നില്ല. സന്തോഷത്തോടെ സാധാരണക്കാരനായി ജീവിക്കാനായിരുന്നു ഇഷ്‍ടം.

സിനിമയിൽ നിന്ന് പൈസയൊക്കെ കിട്ടുമ്പോഴും തനിക്ക് ഒരു ദ്വന്ദ വ്യക്തിത്തമുണ്ടായിരുന്നു. സിനിമ മറ്റുള്ളവർക്കിടയിൽ മുൻഗണന തന്നിരുന്നു. എങ്കിലും സ്വതന്ത്രനായി നടക്കാൻ ആയിരുന്നു തനിക്ക് ഇഷ്‍ടം എന്നും ഊരിക്കളയാൻ ആഗ്രഹിച്ച കുപ്പായമായിരുന്നു സിനിമാക്കാരന്റേത് എന്ന് പറയുമ്പോഴാണ് മമ്മൂട്ടിയുടെ ജീവിത സാഹചര്യങ്ങളെ കുറിച്ചും വി കെ ശ്രീരാമാൻ വ്യക്തമാക്കിയത്.

”കുറച്ചു വൈകിയാണ് മമ്മൂട്ടി സിനിമയിലേക്ക് വരുന്നത്. മമ്മൂട്ടി കോളേജ് വിദ്യാഭ്യാസം കഴിയുന്നു. വക്കീലായിട്ട് പ്രാക്റ്റീസ് ചെയ്യുന്നു. മോഹൻലാലിനൊന്നും ഇല്ലാത്ത തരം ഒരു ജീവിതമുണ്ട് മമ്മൂട്ടിക്ക്. വക്കീലൻമാരുടെ ഇടയിലായാലും അല്ലാത്ത മനുഷ്യൻമാർക്കിടയിലായാലും. വായനയും മറ്റുമൊക്കെയുള്ള സംഭവങ്ങൾ വരുന്നുണ്ട്.. ലാല് കോളേജിൽ എത്തുമ്പോൾ തന്നെ സിനിമിയിൽ ഉണ്ട്. മമ്മൂട്ടിയെ സംബന്ധിച്ച് ഒരു സിനിമാ താരം എന്ന നിലയിൽ വായനയൊക്കെ ബ്രേക്ക് ആയിപ്പോകുന്നുണ്ടായിരുന്നു. അങ്ങനെ സംസാരിക്കാൻ പറ്റിയ ആളായതിനാലാകും താനുമായി സൗഹൃദമുണ്ടായത്”- ശ്രീരാമൻ വ്യക്തമാക്കി.

മമ്മൂട്ടി നായകനായ ഭ്രമയുഗം എന്ന സിനിമ ബോക്സ് ഓഫീസിൽ വൻ കുതിപ്പാണ് നടത്തുന്നത്. ആഗോള ബോക്സ് ഓഫീസിൽ 34 കോടി രൂപയിൽ അധികം ഭ്രമയുഗം നേടിയിട്ടുണ്ട്. സംവിധാനം നിർവഹിച്ചിരിക്കുന്നത് രാഹുൽ സദാശിവനാണ്. രാഹുലിന്റെ ഭൂതകാലം എന്ന സിനിമ മികച്ച അഭിപ്രായം നേടിയ ചിത്രമായിരുന്നു. സിദ്ധാർഥ് ഭരതും അർജുൻ അശോകനുമാണ് ചിത്രത്തില്ലെ മറ്റ് പ്രധാന കഥാപാത്രങ്ങളെ അവതരിപ്പിച്ചിരിക്കുന്നത്.