മമ്മൂട്ടിയുടെ ഏറ്റവും പുതിയ ചിത്രം ഭ്രമയു​ഗത്തിന്റെ അഡ്വാൻസ് ബുക്കിങ്ങിൽ വൻ കളക്ഷൻ. കേരളത്തിനൊപ്പം ഓസ്‌ട്രേലിയ, ജർമ്മനി, യുകെ, യുഎഇ തുടങ്ങിയ രാജ്യങ്ങളിലും ബുക്കിം​ഗ് ഓപ്പൺ ആയിട്ടുണ്ട്. കേരളത്തിൽ ഇനിയും ചില തിയറ്ററുകളിൽ ബുക്കിം​ഗ് സ്റ്റാർട്ട് ചെയ്യാൻ ബാക്കിയാണ്. ആരംഭിച്ച എല്ലാ തിയറ്ററുകളിലും മികച്ച ബുക്കിം​ഗ് ആണ് നടന്നു കൊണ്ടിരിക്കുന്നത്. ഇതുവരെ 10000ലേറെ ടിക്കറ്റുകൾ വിറ്റു കഴിഞ്ഞതായി ഭ്രമയു​ഗത്തിന്റെ ഔദ്യോ​ഗിക പേജ് വഴി അറിയിച്ചിട്ടുണ്ട്.

ബുക്കിം​ഗ് ആരംഭിച്ച് ഏതാനും മണിക്കൂറിനുള്ളിലാണ് പതിനായിരത്തോളം ടിക്കറ്റുകൾ വിറ്റുപോയിരിക്കുന്നത്. കേരളത്തിലെ പ്രധാന തിയറ്ററുകൾ ആയ വനിത- വിനീത, കവിത, ഏരീസ് പ്ലക്സ്, രാഗം, കോഴിക്കോട് കൈരളി, പിവിആർ ശൃംഖലകളിലും ടിക്കറ്റ് ബുക്കിം​ഗ് തകൃതിയായി നടക്കുകയാണ്. ഇങ്ങനയെങ്കിൽ മികച്ച ബുക്കിങ്ങും പ്രി-സെയിൽ ബിസിനസും ആദ്യദിനം തന്നെ ഭ്രമയു​ഗത്തിന് സ്വന്തമാക്കാൻ സാധിക്കുമെന്ന് ഉറപ്പാണ്.

യുഎഇയിലെ വോക്‌സ് സിനിമാസിൽ ഭ്രമയു​ഗത്തിന്റെ 600ലധികം ടിക്കറ്റുകൾ ഇതിനകം വിറ്റുപോയിട്ടുണ്ട്. പത്ത് യുറോപ് രാജ്യങ്ങളിലാണ് ഭ്രമയു​ഗത്തിന്റെ സ്ട്രീമിം​ഗ് നടക്കുക. ഒപ്പം യുഎസ്എ, കാനഡ, ഓസ്ട്രേലിയ, ന്യൂസിലാൻഡ് എന്നിവിടങ്ങളിലും ആറ് ജിസിസി രാജ്യങ്ങളിലും ഭ്രമയു​ഗം റിലീസ് ചെയ്യും.

പ്രേക്ഷകരും നിരൂപകരും ഒരുപോലെ പ്രതീക്ഷ അർപ്പിക്കുന്ന സിനിമയാണ് ഭ്രമയു​ഗം. ഭൂതകാലം എന്ന ചിത്രത്തിന് ശേഷം രാഹുൽ സദാശിവൻ സംവിധാനം ചെയ്യുന്ന ചിത്രമാണിത്. പൂർണമായും ബ്ലാക് ആൻഡ് വൈറ്റിൽ റിലീസ് ചെയ്യുന്ന ചിത്രം ഫെബ്രുവരി 15നാണ് തിയറ്ററിൽ എത്തുക. മമ്മൂട്ടിക്കൊപ്പം അർജുൻ അശോകൻ, സിദ്ധാർത്ഥ് ഭരതൻ, അമാൽഡ ലിസ്, മണികണ്ഠൻ ആചാരി തുടങ്ങിയവരാണ് പ്രധാന കഥാപാത്രങ്ങളെ അവതരിപ്പിക്കുന്നത്.