‘അയലാന്‍’ സിനിമയിലെ ഏലിയന്‍റെ ശബ്‍ദം ഈ താരത്തിന്‍റേത്; ബിഗ് സർപ്രൈസുമായി അണിയറപ്രവർത്തകർ
ശിവകാര്‍ത്തികേയന്‍ നായകനായെത്തുന്ന ‘അയലാന്‍’ എന്ന സയന്‍സ് ഫിക്ഷന്‍ സിനിമയുടെ പുതിയ അപ്‌ഡേറ്റ് പുറത്തുവിട്ട് അണിയറപ്രവർത്തകർ. ചിത്രത്തില്‍ അയലാന്‍ എന്ന അന്യഗ്രഹജീവിയായെത്തുന്ന കഥാപാത്രത്തിന് ശബ്‍ദം നൽകുന്നത് തെന്നിന്ത്യയിലെ പ്രമുഖ താരമായ നടന്‍ സിദ്ധാര്‍ഥ് ആയിരിക്കുമെന്നാണ് അണിയറപ്രവർത്തകർ അറിയിച്ചിരിക്കുന്നത്.
ബോളിവുഡിലെ പി.കെ എന്ന ചിത്രത്തിന്‍റേതുപോലെ ഒരു അന്യഗ്രജീവി ഭൂമിയിലേക്ക് എത്തുന്നത് പ്രമേയമാക്കിയാണ് അയലാന്‍ ഒരുക്കിയിട്ടുള്ളത്. ഏലിയന്‍ എത്തുന്ന രകസകരമായ ടീസർ മുമ്പ് ശ്രദ്ധ നേടിയിരുന്നു. 2015ല്‍ പുറത്തിറങ്ങിയ ‘ഇന്‍ട്ര് നേട്ര് നാളൈ’ എന്ന ചിത്രത്തിലൂടെ ശ്രദ്ധേയനായ സംവിധായകന്‍ ആര്‍. രവികുമാര്‍ ആണ് അയലാന്‍ സംവിധാനം ചെയ്തിരിക്കുന്നത്.
തിരക്കഥ എഴുതിയിരിക്കുന്നതും ആര്‍ രവികുമാറാണ്. രാകുല്‍ പ്രീത് സിംഗ് ആണ് നായികയായെത്തുന്നത്. ശരത് കേല്‍കര്‍ ആണ് പ്രതിനായക കഥാപാത്രമായുള്ളത്. യോഗി ബാബു, ഭാനുപ്രിയ, കരുണാകരന്‍ എന്നിവരാണ് ചിത്രത്തിലെ മറ്റ് താരങ്ങള്‍. ഛായാഗ്രഹണം നിര്‍വഹിക്കുന്നത് നിരവ് ഷായാണ്. എ.ആര്‍ റഹ്‌മാനാണ് ചിത്രത്തിന്‍റെ സംഗീതം ഒരുക്കുന്നത്.
സംഘട്ടനസംവിധാനം അന്‍പറിവ്, എഡിറ്റിംഗ് റൂബൻ, ഗാനരചന വിവേക്, മദന്‍ കര്‍ക്കി. 24 എ.എം സ്റ്റുഡിയോസിന്‍റെ ബാനറില്‍ ആര്‍.ഡി. രാജയാണ് അയലാന്‍ നിര്‍മിക്കുന്നത്. ചിത്രം 2024 പൊങ്കല്‍ റിലീസ് ആയി തിയേറ്ററുകളിലെത്താനിരിക്കുകയാണ്.
