”ഇവിടെ വരെയെത്താൻ ഒരുപാട് കഷ്ടപ്പെട്ടു, ഇനി ആർക്ക് വേണ്ടിയും ഒന്നും വിട്ട് കൊടുക്കില്ല”; സിനിമാ ജീവിതം 20 വർഷം പിന്നിടുമ്പോൾ നയൻതാര

2003ൽ സത്യൻ അന്തിക്കാട് സംവിധാനം ചെയ്ത മനസ്സിനക്കരെ എന്ന ചിത്രത്തിലൂടെയാണ് തെന്നിന്ത്യൻ താരം നയൻതാരയുടെ കരിയർ ആരംഭിക്കുന്നത്. ഈ വർഷം ഇറങ്ങാനിരിക്കുന്ന അന്നപൂര്‍ണയോടുകൂടി കരിയറില്‍ 20 വര്‍ഷം പൂര്‍ത്തിയാക്കുകയാണ് താരം. ഇവിടെ വരെ എത്താന്‍ താന്‍ ഒരുപാട് കഷ്ടപ്പെട്ടിട്ടുണ്ട്. തന്റെ ജോലി കറക്ടായി ചെയ്തതുകൊണ്ടാണ് ഇവിടെ വരെ എത്തിയത്. പക്ഷെ ഇക്കാലം വരെയും ഒരു കാര്യം മാത്രം ഞാന്‍ ആര്‍ക്കു വേണ്ടിയും ഒന്നിനു വേണ്ടിയും വിട്ടുകൊടുത്തിട്ടില്ല എന്ന് പറയുകയാണ് നയന്‍താര.

അന്നപൂര്‍ണയുടെ പ്രമോഷനുമായി ബന്ധപ്പെട്ട അഭിമുഖത്തില്‍ സംസാരിക്കവെ, 20 വര്‍ഷത്തെ തന്റെ കരിയറിനെ കുറിച്ചും നടി വാചാലയായി. ‘ഇപ്പോള്‍ തിരിഞ്ഞു നോക്കുമ്പോള്‍ വളരെ അധികം അഭിമാനം തോന്നുന്നു. എന്ത് ചെയ്യണം, എങ്ങനെ ചെയ്യണം, എവിടെ ഇരിക്കണം, എങ്ങനെ നോക്കണം, ക്യാമറ എന്താണ് എന്നൊന്നും അറിയാത്ത ആ തുടക്ക കാലം മുതല്‍ ഇവിടെ വരെ, ഇന്നത്തെ നില വരെ എത്തി നില്‍ക്കുമ്പോള്‍ സ്വയം അഭിമാനമാണ് എനിക്ക് തോന്നുന്നത്. ഞാന്‍ ഒരുപാട് കഷ്ടപ്പെട്ടിട്ടുണ്ട്, എന്റെ ജോലി ഞാന്‍ കറക്ടായി ചെയ്തിട്ടുണ്ട്. സിനിമ എന്താണെന്ന് അറിയാത്തപ്പോള്‍ അത് പഠിക്കണം എന്ന് ഞാന്‍ ആഗ്രഹിച്ചിട്ടുണ്ട്. എനിക്ക് നല്ല സിനിമകള്‍ കിട്ടിയിട്ടുണ്ട്. ഇന്ന് ഇവിടെ വരെ വന്നു നില്‍ക്കാന്‍ അതെല്ലാം കാരണമാണ്.’

‘ഇതാണ് സിനിമ, ഇങ്ങനെയാണ് സിനിമ ഉണ്ടാവുക എന്നൊക്കെ അനുഭവങ്ങളില്‍ നിന്നാണ് പഠിച്ചത്. അങ്ങനെ മനസ്സിലാക്കിയതിന് ശേഷം ചെയ്ത സിനിമകളെ കുറിച്ചൊക്കെ ചിന്തിയ്ക്കുമ്പോള്‍ വളരെ നല്ലതായി ഫീല്‍ ചെയ്യുന്നു. എനിക്കെന്താണ് ശരി എന്ന് തോന്നുന്നത് അതാണ് ഞാന്‍ ജീവിതത്തിലും സിനിമയിലും ചെയ്തിട്ടുള്ളത്. ഭാഗ്യം വേണം, അതിനപ്പുറം ഹാര്‍ഡ് വര്‍ക്കില്‍ ആണ് ഞാന്‍ വിശ്വസിക്കുന്നത്. നിങ്ങള്‍ക്ക് കഴിവുണ്ടോ ഇല്ലയോ, നിങ്ങള്‍ കാണാന്‍ സുന്ദരിയാണോ അല്ലയോ അതിന് വേണ്ടി പരിശ്രമിക്കുന്നത് വളരെ പ്രാധാന്യമാണ്. അതാണ് സിനിമയ്ക്ക് വേണ്ടി ഞാന്‍ ചെയ്തിട്ടുള്ള കാര്യം.

സിനിമയില്‍ ആയാലും ജീവിതത്തില്‍ ആയാലും ഒരു കാര്യം മാത്രം ഞാന്‍ ആര്‍ക്കു വേണ്ടിയും, എന്തിനു വേണ്ടിയും വിട്ടു കൊടുക്കില്ല, ആത്മാഭിമാനം! തെറ്റ് ചെയ്താല്‍ ദേഷ്യപ്പെടും പക്ഷെ മറ്റുള്ളവരോട് ഞാന്‍ വളരെ ബഹുമാനത്തോടെ പെരുമാറും. നല്ല രീതിയില്‍ എല്ലാവരെയും ട്രീറ്റ് ചെയ്യും. അത് മറ്റുള്ളവരില്‍ നിന്ന് എനിക്ക് തിരിച്ചു കിട്ടാനും ഞാന്‍ ആഗ്രഹിക്കുന്നു. ഈ 20 വര്‍ഷത്തെ കരിയറില്‍ ആ ഒരു സെല്‍ഫ് റസ്‌പെക്ട് ആര്‍ക്കു വേണ്ടിയും എന്തിന് വേണ്ടിയും ഞാന്‍ വിട്ടുകൊടുത്തിട്ടില്ല.

ഈ കാലത്തിനുള്ളില്‍ ആളുകളില്‍ നിന്ന് കിട്ടിയ സ്‌നേഹം വളരെ വലുതാണ്. പണമോ പേരോ പ്രശസ്തിയോ എളുപ്പം നേടാം, പക്ഷെ ആളുകളുടെ സ്‌നേഹം സമ്പാദിക്കാന്‍ കഴിയുക എന്നത് വലിയ കാര്യം തന്നെയാണ്. എനിക്ക് കിട്ടുന്ന ഈ സ്‌നേഹം വിശ്വസിക്കാന്‍ കഴിയാത്തതാണ്. ആ സ്‌നേഹം കാണുമ്പോഴാണ് സിനിമയോടുള്ള ബഹുമാനം പിന്നെയും പിന്നെയും കൂടുന്നത്. സിനിമ പോലെ മറ്റൊന്നും ഇല്ല. സിനിമ ചെയ്യുമ്പോള്‍ കിട്ടുന്ന സംതൃപ്തി, സന്തോഷം അതൊന്നും മറ്റൊന്നിലും കിട്ടില്ല- നയന്‍താര പറഞ്ഞു.

Related Posts