ടിനു പാപ്പച്ചന്‍ സംവിധാനം ചെയ്യുന്ന ‘ചാവേര്‍’ ചിത്രം തിയേറ്ററുകളിലേക്ക് എത്താനൊരുങ്ങുകയാണ്. ഏഴ് മാസത്തിന് മുമ്പാണ് ചിത്രത്തിന്റെ മോഷന്‍ പോസ്റ്റര്‍ എത്തിയത്. കുഞ്ചാക്കോ ബോബന്റെ ആക്ഷന്‍ രംഗം അടക്കം അടങ്ങുന്നതായിരുന്നു മോഷന്‍ പോസ്റ്റര്‍. ഇതിന് ശേഷം ചിത്രത്തിന്റെ സ്റ്റില്ലുകള്‍ മാത്രമാണ് പുറത്തുവന്നത്. ടീസറോ, ട്രെയ്ലറോ, ഗാനങ്ങളോ പുറത്തു വിട്ടിരുന്നില്ല. അതുകൊണ്ട് തന്നെ പ്രേക്ഷകര്‍ ആകാംഷയിലാണ്. ചിത്രം റിലീസ് ചെയ്യുന്നതിന് മുന്നേ ട്രെയ്‌ലര്‍ പുറത്തുവിടുമോ എന്ന ആരാധകരുടെ ചോദ്യത്തിന് ഇപ്പോള്‍ മറുപടി നല്‍കിയിരിക്കുകയാണ്. ചിത്രത്തിന്റെ ട്രെയ്‌ലറാണ് ഇപ്പോള്‍ പുറത്തുവിട്ടിരിക്കുന്നത്.

‘സ്വാതന്ത്ര്യം അര്‍ദ്ധരാത്രിയില്‍’, ‘അജഗജാന്തരം’ എന്നീ സൂപ്പര്‍ ഹിറ്റ് സിനിമകള്‍ക്ക് ശേഷം ടിനു പാപ്പച്ചന്‍ ഒരുക്കുന്ന ചിത്രമാണ് ചാവേര്‍. നടനും സംവിധായകനുമായ ജോയ് മാത്യു തിരക്കഥയൊരുക്കുന്ന ചിത്രം അരുണ്‍ നാരായണ്‍, വേണു കുന്നപ്പിള്ളി എന്നിവര്‍ ചേര്‍ന്നാണ് നിര്‍മിക്കുന്നത്. അതേസമയം റിലീസിനൊരുങ്ങുന്ന കുഞ്ചാക്കോ ബോബന്‍ ചിത്രം ഒടിടിയില്‍ എവിടെയായിരിക്കും എന്ന റിപ്പോര്‍ട്ടാണ് ഇപ്പോള്‍ ചര്‍ച്ചയാകുന്നത്.

സോണി ലിവ് മികച്ച മലയാള ചിത്രങ്ങള്‍ സ്ട്രീം ചെയ്ത ഒരു പ്ലാറ്റ്‌ഫോമാണ്. സോണി ലിവാണ് റിലീസാകാനിരിക്കുന്ന ചാവേറിന്റെയും ഒടിടി റൈറ്റ്‌സ് നേടിയിരിക്കുന്നത്. ചാവേര്‍ മികച്ച ഒരു ത്രില്ലര്‍ ചിത്രമായിരിക്കും എന്ന് ഇതില്‍ നിന്ന് വ്യക്തമാണെന്ന് ആരാധകര്‍ അഭിപ്രായപ്പെടുന്നു. തിയറ്റര്‍ റിലീസിനും ഒരു മാസത്തിനു ശേഷമാകും കുഞ്ചോക്കോ ബോബന്റെ പുതിയ ചിത്രം ചാവേര്‍ ഒടിടിയിലേക്ക് എത്തുക എന്നാണ് റിപ്പോര്‍ട്ട്.

അര്‍ജുന്‍ അശോകനും ആന്റണി വര്‍ഗീസും ചിത്രത്തില്‍ പ്രധാന വേഷങ്ങളിലുണ്ട്. അരുണ്‍ നാരായണന്‍ പ്രൊഡക്ഷന്‍സിന്റെയും കാവ്യ ഫിലിംസിന്റെയും ബാനറിലാണ് ചാവേറിന്റെ നിര്‍മാണം. അരുണ്‍ നാരായണനും വേണു കുന്നപ്പിള്ളിയുമാണ് നിര്‍മാണം. ചാവേറിന്റെ റിലീസ് പ്രഖ്യാപിച്ചിട്ടില്ലെങ്കിലും വൈകാതെ ചിത്രം പ്രദര്‍ശനത്തിന് എത്തും എന്നാണ് പ്രതീക്ഷിക്കുന്നത്.

ചാവേര്‍ ഒരു ത്രില്ലര്‍ ഴോണറിലുള്ള സിനിമയാണ് എന്ന് കുഞ്ചാക്കോ ബോബന്‍ ഏഷ്യാനെറ്റ് ന്യൂസ് ഓണ്‍ലൈനിനു നല്‍കിയ അഭിമുഖത്തില്‍ വ്യക്തമാക്കിയിരുന്നു. അതിനേക്കാളും അപ്പുറം മാനുഷിക മൂല്യങ്ങളും ചിത്രത്തില്‍ സ്പര്‍ശിക്കുന്നുണ്ട്. അതുകൊണ്ട് എല്ലാവര്‍ക്കും റിലേറ്റ് ചെയ്യാനാകുന്ന സിനിമയാണ് ചാവേര്‍. എന്റര്‍ടെയ്‌നറാണ് അതില്‍ യാതൊരു സംശയവുമില്ല എന്നും കുഞ്ചാക്കോ ബോബന്‍ എന്നു പറഞ്ഞിരുന്നു. സംവിധായകന്‍ ടിനു പാപ്പച്ചനെ കുറിച്ചും താരം രസകരമായ ഒരു കാര്യം അഭിപ്രായപ്പെട്ടിരുന്നു. താരങ്ങളെ വേറിട്ട ഒരു രീതിയില്‍ സിനിമയില്‍ പ്രൊജക്റ്റ് ചെയ്യാന്‍ മിടുക്കുള്ളയാളാണ് ടിനു പാപ്പച്ചന്‍ എന്നായിരുന്നു കുഞ്ചാക്കോ ബോബന്‍ വ്യക്തമാക്കിയത്. എന്തായാലും കുഞ്ചാക്കോ ബോബന്റെ പുതിയ ചിത്രത്തിനായി കാത്തിരിക്കുകയാണ് നടന്റെ ആരാധകര്‍.