മോഹൻലാൽ – ജീത്തു ജോസഫ് കൂട്ടുകെട്ടിലൊരുങ്ങിയ നേര് വൻ വിജയമായിരുന്നു. മോഹൻലാലിന് ഏറെ നാളിന് ശേഷം ബ്രേക്ക് നൽകിയ ചിത്രം കൂടിയായിരുന്നു ഇത്. നേരിന് ശേഷം മോഹൻലാലിനെ നായകനാക്കി ജീത്തു ജോസഫ് മറ്റൊരു ചിത്രം കൂടെ പ്രഖ്യാപിച്ചിരുന്നു. റാം എന്ന് പേര് നൽകിയ ആ ചിത്രം ഉടൻ ചിത്രീകരണം ആരംഭിക്കും എന്നായിരുന്നു വിവരം.

എന്നാലിപ്പോൾ റാം ഉടനെ ഇല്ലെന്നാണ് പുതിയ വിവരം. മാത്രമല്ല, ജീത്തു ജോസഫ് തന്റെ പുതിയ സിനിമ പ്രഖ്യാപിക്കുകയും ചെയ്തു. ഫഹദ് ഫാസിൽ ആണ് നായകൻ. നേരിന് തിരക്കഥ ഒരുക്കിയ ശാന്തി മായാ​ദേവി തന്നെയാണ് ഈ സിനിമയും എഴുതിയിരിക്കുന്നത്. ഈ ഫോർ എന്റർടെയ്ൻമെൻസ് ആണ് നിർമാണം. ഇതോടെ ജീത്തു ജോസഫ്- ഫഹദ് ഫാസിൽ കോമ്പോ മികച്ചൊരു സിനിമാനുഭവം സമ്മാനിക്കുമെന്ന പ്രതീക്ഷയിൽ ആണ് സിനിമാസ്വാദകർ. ചിത്രത്തെ സംബന്ധിച്ച മറ്റ് വിവരങ്ങൾ പിന്നാലെ പുറത്തുവരും.

അതേസമയം, റാം എന്ന മോഹൻലാൽ ചിത്രത്തിനായാണ് കഴിഞ്ഞ കുറേ നാളായി മലയാളികൾ കാത്തിരിക്കുന്നത്. ജീത്തു ജോസഫ് തന്നെയാണ് സിനിമ സംവിധാനം ചെയ്യുന്നതും. ആക്ഷൻ ത്രില്ലർ ഗണത്തിൽ ഒരുങ്ങുന്ന റാമിൻറെ രചന നിർവഹിച്ചിരിക്കുന്നതും ജീത്തു തന്നെയാണ്. ഇന്ദ്രജിത്ത്, സിദ്ദിഖ്, സായ്‍കുമാർ, ആദിൽ ഹുസൈൻ, വിനയ് ഫോർട്ട്, ദുർഗ്ഗ കൃഷ്ണ തുടങ്ങിയവർ പ്രധാന വേഷത്തിൽ എത്തുന്ന ചിത്രത്തിൽ തൃഷയാണ് നായികയായി എത്തുന്നത്.

അടുത്തിടെ ചിത്രത്തിൻറെ പ്രൊഡ്യൂസറെ ജീത്തു പരിചയപ്പെടുത്തിയിരുന്നു. തൻറെ പ്രധാന സംവിധാന സഹായിയും ശിഷ്യനുമായ അർഫാസ് അയൂബാണ് അത്. ഇതേ അവസരത്തിൽ റാമിൻറെ ഷൂട്ടിംഗ് ഉടൻ തുടങ്ങുമെന്നും ജീത്തു അറിയിച്ചിരുന്നു. ആവേശം ആണ് ഫഹദിൻറേതായി ഏറ്റവും ഒടുവിൽ റിലീസ് ചെയ്ത ചിത്രം. വിഷു റിലീസ് ആയെത്തിയ ചിത്രം മികച്ച മൗത്ത് പബ്ലിസിറ്റി നേടി ബോക്സ് ഓഫീസിൽ 150 കോടി ക്ലബ്ബിലും ഇടംനേടിയിരുന്നു.