ഫോൺപേയോ ജിപേയോ അങ്ങനെ ഏതെങ്കിലും യുപി‍ഐ പ്ലാറ്റ്‌ഫോം ഉപയോഗിച്ച് പണമടച്ച ശേഷം കേൾക്കുന്ന മെസേജിലെ ശബ്ദം ചിരപരിചിതമായി തോന്നിയോ? മമ്മൂട്ടിയുടേതു പോലെ തോന്നിയോ? തോന്നൽ അല്ല, അടച്ച തുകയും അതിനു നന്ദിയും പറഞ്ഞത് മമ്മൂട്ടി തന്നെയാണ്. മമ്മൂട്ടിയുമായി സഹകരിച്ച് സ്മാർട്ട്സ്പീക്കറുകളിൽ ആദ്യത്തെ സെലിബ്രിറ്റി വോയ്സ് ഫീച്ചർ അവതരിപ്പിച്ചിരിക്കുന്നത് ഫോൺപേയാണ്.

ഈ പുതിയ ഫീച്ചർ ഇന്ത്യയിലുടനീളം ലഭ്യമാക്കിക്കഴിഞ്ഞു. മലയാളത്തിലും ഇംഗ്ലീഷിലുമാണ് മമ്മൂട്ടിയുടെ ശബ്ദം ഉപയോഗിച്ചിരിക്കുന്നത്. ഹിന്ദിയിൽ അമിതാഭ് ബച്ചൻറെ ശബ്ദവും ഉപയോഗിച്ചിട്ടുണ്ട്. ഇംഗ്ലീഷിലും മമ്മൂട്ടിയെ കൂടാതെ ബച്ചൻറെ ശബ്ദവും ഉപയോഗിക്കുന്നു. ഭാവിയിൽ ഇത് കൂടുതൽ ഭാഷകളിലേക്ക് പുറത്തിറക്കാനുള്ള പദ്ധതിയിലാണ്.

രാഴ്ച മുന്നേ ഇത്തരം സ്മാർട്ട് വോയിസിന്റെ പരീക്ഷണം നടത്തുകയും അത് വിജയിച്ചതിനാലുമാണ് പുതിയ ഫീച്ചർ സ്ഥിരമാക്കാൻ തീരുമാനിച്ചത്. ”ഫോൺപേ സ്മാർട്ട് സ്പീക്കറിൽ മൾട്ടി സെലിബ് വോയിസ് ഫീച്ചർ അവതരിപ്പിക്കുന്നു. രാജ്യമെമ്പാടുമുള്ള വ്യാപാരികൾക്ക് ഇനിമുതൽ തെലുങ്ക്, മലയാളം, കന്നഡ,ഹിന്ദി ഭാഷകളിൽ മഹേഷ് ബാബു, മമ്മൂട്ടി, കിച്ചാ സുദീപ്, അമിതാഭ് ബച്ചൻ എന്നിവരുടെ ഐക്കോണിക് ശബ്ദത്തിൽ പേയ്‌മെന്റ് അലർട്ടുകൾ ആസ്വദിക്കാനാകും”- ഫോൺപേ അവരുടെ എക്‌സ് പേജിൽ കുറിച്ചു.