മമ്മൂട്ടിയെ കേന്ദ്രകഥാപാത്രമാക്കി രാഹുൽ സദാശിവൻ സംവിധാനം ചെയ്യുന്ന ‘ഭ്രമയുഗം’ പ്രേക്ഷകർ ആവേശത്തോടെ കാത്തിരിക്കുന്ന ചിത്രമാണ്. നിരവധി സവിശേഷതകളോടെയാണ് ഭ്രമയുഗം എത്തുന്നത്. ബ്ലാക്ക് ആന്‍ഡ് വൈറ്റില്‍ ഒരുക്കുന്നു, ഹൊറർ പശ്ചാത്തലത്തിലുള്ള ചിത്രം എന്നിങ്ങനെ കൗതുകം സമ്മാനിക്കുന്ന നിരവധി ഘടകങ്ങൾ തന്നെയാണ് ചിത്രത്തിനായുള്ള കാത്തിരിപ്പിന് ആക്കം കൂട്ടുന്നത്. ഫെബ്രുവരി 15നാണ് ഭ്രമയുഗം തിയേറ്ററുകളിലെത്തുക. ചിത്രത്തിന്റെ ഫസ്റ്റ് ലുക്ക് പോസ്റ്ററും ടീസറുമെല്ലാം ഇതിനകം ശ്രദ്ധ നേടിക്കഴിഞ്ഞു.

പ്രഖ്യാപനം മുതൽ പ്രേക്ഷകനെ മുൾമുനയിൽ നിർത്തിയ ചിത്രമാണ് ഭ്രമയു​ഗം. പിന്നാലെ വന്ന അപ്ഡേറ്റുകളും പോസ്റ്ററുകളും പ്രേക്ഷകരെ സിനിമയിലേക്ക് ആകർഷിച്ചു. ഇനി ഏഴ് ദിവസമാണ് ചിത്രത്തിന്റെ റിലീസിന് ഉള്ളത്. ഈ അവസരത്തിൽ ഭ്രമയു​ഗം ട്രെയിലർ എവിടെ എന്നാണ് ആരാധകർ ചോദിക്കുന്നത്.

ട്രെയിലർ വേ​ഗം റിലീസ് ചെയ്യാൻ പറയുകയാണ് ആരാധകരും സിനിമാസ്വാദകരും. ‘മമ്മൂക്ക..ട്രെയിലർ എവിടെ’ എന്നാണ് ആരാധകർ ചോദിക്കുന്നത്. വേ​ഗം ട്രെയിലർ ഇറക്കിവിടൂവെന്നും ഇവർ പറയുന്നുണ്ട്. അതേസമയം, ട്രെയിലറിന്റെ ഫൈനൽ പരിപാടികൾ കഴിഞ്ഞെന്നും ഫെബ്രുവരി പത്ത് അല്ലെങ്കിൽ ഒൻപതിന് റിലീസ് ചെയ്യുമെന്നും അനൗദ്യോ​ഗിക വിവരമുണ്ട്. സാധ്യതയും ഏറെയാണ്.

അതേസമയം ബ്ലാക്ക് ആൻഡ് വൈറ്റ് ചിത്രമായതുകൊണ്ട് വലിയ ബജറ്റ് വരില്ലെന്നാണ് ചിലരുടെ കണ്ടെത്തൽ. അഭിനേതാക്കൾക്ക് വിലകൂടിയ കോസ്റ്റ്യൂമുകൾ പോലും ആവശ്യമില്ലെന്നും ചില രസികർ ചൂണ്ടികാണിക്കുന്നു. 12 വെള്ള മുണ്ടുകളുടെ ചെലവ് മാത്രമല്ലേയുള്ളൂ എന്നാണ് ചിലരുടെ പരിഹാസം. അതേസമയം, മമ്മൂട്ടിയുടെ റിലീസിനൊരുങ്ങുന്ന ചിത്രങ്ങളിൽ ഏറ്റവും ബജറ്റ് കൂടിയ ചിത്രമാണിത്, ഏതാണ്ട് 35 കോടിയാണ് ബജറ്റ് എന്നും വാർത്തകളുണ്ടായിരുന്നു.