നാല് തലമുറയുടെ ഓര്‍മ്മകള്‍ ബാക്കി വച്ച് യാത്രയായിരിക്കുകയാണ് നടി സുബ്ബലക്ഷ്മി. കൊച്ചുമകളുടെ മകള്‍ സുദര്‍ശനയേയും കണ്ട്, അവരുടെ സന്തോഷങ്ങളുടെ ഭാഗമായിട്ടാണ് സുബ്ബലക്ഷ്മി അമ്മാൾ ലോകത്തോട് വിട പറഞ്ഞത്. താരത്തിന്റെ സിനിമയിലേക്കുള്ള വരവ് 69–ാം വയസ്സിലായിരുന്നു. എന്നിട്ട് കൂടി നിരവധി സിനിമകളുടെ ഭാ​ഗമാകാൻ താരത്തിന് കഴിഞ്ഞു.

പല്ലു പോകുന്ന പ്രായത്തിൽ സിനിമയിലേക്കെത്തിയ കഥ വിവരിച്ച് സുബ്ബലക്ഷ്മി തന്നെ ചിരിക്കുമായിരുന്നു. പക്ഷേ താരത്തിന്റെ പല്ലുകൾ നഷ്ടപ്പെട്ടത് കൂടിയ പ്രായത്തിലല്ല, തന്റെ 35–ാം വയസ്സിൽ ഒരപകടത്തിൽ പെട്ടായിരുന്നു. എന്നാൽ വയ്പുപല്ലു വയ്ക്കാൻ സുബ്ബലക്ഷ്മി ആ പ്രായത്തിലും തയാറായില്ല. പിന്നീടങ്ങോട്ട് മരണം വരെയും പല്ലുകളില്ലാതെ ജീവിച്ചു.

2002ൽ പുറത്തിറങ്ങിയ നന്ദനം എന്ന സിനിമയിലൂടെയാണ് സുബ്ബലക്ഷ്മിയമ്മാൾ ബി​ഗ്സ്ക്രീനിലെത്തുന്നത്. നടൻ സിദ്ദീഖ് ആണു നന്ദനത്തിലെ വേഷത്തിലേക്ക് സംവിധായകനായ രഞ്ജിത്തിനോട് ശുപാർശ ചെയ്തത്. നാട്ടിൻപുറത്തുകാരി മുത്തശ്ശിയായ ശേഷം രണ്ടാമത്തെ ചിത്രമായ ​ഗ്രാമഫോണിൽ ഫ്രോക്ക് ധരിച്ച ആംഗ്ലോ ഇന്ത്യൻ മുത്തശ്ശിയായി അഭിനയിച്ചു. കല്യാണരാമനാണ് ഏറെ പ്രശസ്തി നേടിക്കൊടുത്ത സിനിമ. മലയാളത്തിനു പുറമെ അന്യഭാഷകളിലും അഭിനയിച്ചിട്ടുണ്ട്.