നടനും സ്റ്റേജ് പെർഫോമറുമായ ടിനി ടോം വിദേശ പര്യടനത്തിനിടെ തനിക്ക് നേരിട്ട ഒരു ദുരനുഭവം തുറന്ന് പറയുകയാണ്. സ്‌പോണ്‍സര്‍മാര്‍ വഴിയാണ് താരങ്ങള്‍ വിദേശത്ത് ഷോകള്‍ അവതരിപ്പിക്കാനായി പോകുന്നത്. എന്നാല്‍ വ്യാജ സ്‌പോണ്‍സര്‍മാര്‍ കാരണം ഒരുപാട് ദുരനുഭവങ്ങള്‍ വിദേശത്ത് പരിപാടി അവതരിപ്പിക്കാന്‍ പോകുമ്പോള്‍ നേരിടേണ്ടി വരാറുണ്ട് ഇവർക്ക്.

ഒരിക്കല്‍ വിദേശത്തുള്ള ഒരു പരിപാടിക്കിടെ നടി ചഞ്ചലിനെ കയറിപ്പിടിച്ച സംഭവം വരെ ഉണ്ടായിട്ടുണ്ട് എന്നാണ് ടിനി ടോം പറയുന്നത്. കൗമുദി മൂവീസിന് നല്‍കിയ അഭിമുഖത്തിലാണ് ദുരനുഭവങ്ങള്‍ ടിനി ടോം പറഞ്ഞത്. ”ഗള്‍ഫ് യാത്രകളാണ് എനിക്ക് സാമ്പത്തികമായി സ്റ്റെബിലിറ്റി തന്നത്. എന്റെ ആദ്യത്തെ വീടിന്റെ ഓരോ ഇഷ്ടികയിലും ഗള്‍ഫ് മലയാളികളുടെ വിയര്‍പ്പുണ്ട്.

തുടക്കകാലത്ത് സ്റ്റേജ് ഷോകള്‍ക്കായി വിദേശത്ത് ചെല്ലുമ്പോള്‍ സ്‌പോസര്‍മാര്‍ക്കൊപ്പം മറപറ്റി വന്ന് ആളാന്‍ ശ്രമിക്കുന്ന ചില ആളുകളില്‍ നിന്ന് മോശം അനുഭവം ഉണ്ടായിട്ടുണ്ട്. ദിലീപിന്റെ കൂട്ടുകാരനാണെന്നും മമ്മൂട്ടിയേയും ഭാവനയേയും അറിയാമെന്നൊക്കെ പറഞ്ഞ് ഒരാള്‍ ഞങ്ങള്‍ക്ക് മുമ്പില്‍ ഒരുപാട് നാടകം കളിച്ചിരുന്നു. പിന്നീടാണ് മനസിലായത് എല്ലാം നുണയായിരുന്നുവെന്ന്.

ഒരിക്കല്‍ ഗള്‍ഫില്‍ പോയപ്പോള്‍ ഒരാളെ ഞാന്‍ പരിചയപ്പെട്ടിരുന്നു. ഫിസിക്കല്‍ ബൈബിളുണ്ടെന്ന് പറഞ്ഞ് അയാളുടെ വീട്ടിലേക്ക് എന്നെ കൊണ്ടുപോവുകയൊക്കെ ചെയ്തിരുന്നു. അത് എന്ത് ബൈബിളാണെന്ന് എനിക്ക് ഇതുവരെ മനസിലായിട്ടില്ല. സ്‌പോര്‍ട്‌സ് കാര്‍ അടക്കം വാടകയ്ക്ക് എടുത്ത് വന്ന് എന്നെ ഞെട്ടിക്കാന്‍ അയാള്‍ ശ്രമിച്ചിരുന്നു.

ഒരു ദിവസം ഇയാള്‍ ഞങ്ങള്‍ ഷോ ചെയ്യുമ്പോള്‍ സ്റ്റേജിന്റെ ഫ്രണ്ടില്‍ തന്നെ വന്നിരുന്ന് പെര്‍ഫോം ചെയ്യുമ്പോള്‍ ഉച്ചത്തില്‍ ഞങ്ങളുടെ പേര് വിളിക്കുകയായിരുന്നു. ഞങ്ങളുമായൊക്കെ അടുത്ത ബന്ധമുണ്ടെന്ന് കാണിക്കാനുള്ള ശ്രമത്തിന്റെ ഭാഗമായിരുന്നു അത്. അങ്ങനെ അത് കഴിഞ്ഞപ്പോള്‍ ഇയാള്‍ വന്ന് പറഞ്ഞു ചഞ്ചലിനെ ഒന്ന് പരിചയപ്പെടുത്തി തരണമെന്ന്.

മര്യാദയ്‌ക്കൊക്കെ പെരുമാറണമെന്ന് പറഞ്ഞാണ് ചഞ്ചലിനെ ഇയാള്‍ക്ക് പരിചയപ്പെടുത്തി കൊടുത്തത്. പക്ഷെ ഇയാള്‍ ചഞ്ചലിനെ കേറി പിടിച്ചു. ചക്കരകുടം കണ്ടാല്‍ കയ്യിടാന്‍ തോന്നുമെന്നാണ് ഞാന്‍ പ്രതികരിച്ചപ്പോള്‍ അയാള്‍ പറഞ്ഞ മറുപടി. ഞാന്‍ ഷോക്കായി നിന്നൊരു സംഭവമായിരുന്നു അത്. ഞാന്‍ ആകെ തകര്‍ന്നുപോയി. മമ്മൂക്കയ്ക്ക് ഇത്തരക്കാരെ കണ്ടാല്‍ പെട്ടന്ന് മനസിലാകും. ഇയാളെ കണ്ടതും മമ്മൂക്കയ്ക്ക് പന്തികേട് മണത്തു. കണ്ടപാടെ മമ്മൂക്ക അയാളെ ഇറക്കിവിട്ടു”- ടിനി ടോം വ്യക്തമാക്കി.