പ്രേക്ഷകർ ഏറെ പ്രതീക്ഷയോടെ കാത്തിരിക്കുന്ന ചിത്രമാണ് നേര്. ചെറിയൊരു ഇടവേളയ്ക്ക് ശേഷം നടൻ മോഹൻലാൽ ജീത്തു ജോസഫിനൊപ്പം ഹിറ്റ് സൃഷ്ടിക്കുമോയെന്നാണ് ഇപ്പോൾ ആരാധകർക്ക് അറിയേണ്ടത്. റിലീസിന് ഇനി രണ്ട് ദിവസങ്ങൾ മാത്രമുള്ളപ്പോൾ പ്രതീക്ഷ കൂടുകയല്ലാതെ കുറയുന്നില്ല. ഇതിനിടെ കേരളത്തിൽ നേരിന് പ്രീ സെയിലിൽ തന്നെ മികച്ച സ്വീകാര്യതയാണ് ലഭിക്കുന്നത് എന്നാണ് ബോക്സ് ഓഫീസ് റിപ്പോർട്ട്.

നേര് 21നാണ് പ്രദർശനത്തിനെത്തുക. കേരളത്തിൽ മോഹൻലാലിന്റെ നേര് 584 ഷോകളിൽ നിന്നായി 33.84 ലക്ഷം രൂപ നേടിയിരിക്കുന്നു എന്നത് മികച്ച സൂചനയാണ് എന്നാണ് ട്രേഡ് അനലിസ്റ്റുകൾ സാക്ഷ്യപ്പെടുത്തുന്നത്. വലിയ ഹൈപ്പുകളൊന്നുമില്ലാതെ പൂർത്തിയായ മോഹൻലാൽ ചിത്രം നേര് വളരെ അടുത്താണ് ചർച്ചകളിൽ നിറയാൻ തുടങ്ങിയത്. അതിനാൽ നിലവിലെ സൂചനയനുസരിച്ച് റിലീസ് കളക്ഷനിൽ നേരിന് മികച്ച നേട്ടമുണ്ടാക്കാൻ കഴിയും എന്നാണ് ബോക്സ് ഓഫീസ് റിപ്പോർട്ടുകൾ വ്യക്തമാക്കുന്നതും.

റിയലിസ്റ്റിക് സമീപനമാണ് മോഹനലാലിന്റെ നേരിന് സംവിധായകൻ ജീത്തു ജോസഫ് നൽകിയിരിക്കുന്നത്. യഥാർഥ ജീവിതത്തിൽ അഭിഭാഷകയാണ് നേരിന്റെ തിരക്കഥാകൃത്ത് ശാന്തി മായാദേവി. നേര് ഒരു സത്യാന്വേഷണമാണ് എന്നും കഥാപാത്രത്തെ റിയലിസ്റ്റിക്കായി അവതരിപ്പിക്കാൻ നടൻ എന്ന നിലയിൽ സഹായിച്ചത് നേരിന്റെ തിരക്കഥാകൃത്തായ ശാന്താ മായാദേവിയുടെ നിർദ്ദേശങ്ങളാണെന്നും മോഹൻലാൽ വ്യക്തമാക്കിയിരുന്നു.

ഡിസ്‍നി പ്ലസ് ഹോട്‍സ്റ്റാർ ചിത്രത്തിന്റെ ഒടിടി റൈറ്റ്‍സ് നേടിയിരിക്കുകയാണ് എന്നും നേരിന്റെ റിലീസിന് ഒരു മാസത്തിന് ശേഷമാണ് ഓൺലൈനിൽ പ്രദർശനത്തിനെത്താൻ സാധ്യത എന്നുമാണ് ഔദ്യോഗിക വൃത്തങ്ങൾ അറിയിക്കുന്നത്. കേരളത്തിനു പുറമേ റിയാദിലും ജിദ്ദയിലുമൊക്കെ നേരിന്റെ ഫാൻസ് ഷോ ചാർട്ട് ചെയ്‍തിട്ടുണ്ട്.