സിനിമാ ചിത്രീകരണത്തിനിടെ ബോളിവുഡ് താരം വരുണ്‍ ധവാന് പരിക്കേറ്റു. ‘വിഡി 18’ എന്ന് താത്കാലികമായി പേരിട്ടിരിക്കുന്ന സിനിമയുടെ ചിത്രീകരണം നടക്കുന്നതിനിടെയായിരുന്നു അപകടം. നീരുവെ നച്ച കാലുമായിരിക്കുന്ന ചിത്രം താരം ഇന്‍സ്റ്റഗ്രാമില്‍ പങ്കുവെച്ചുകൊണ്ടാണ് അപകടത്തെ കുറിച്ച് അറിയിച്ചിരിക്കുന്നത്.

ഇരുമ്പ് കമ്പിയില്‍ കാലിടിച്ചാണ് പരിക്കുപറ്റിയതെന്നാണ് താരം വ്യക്തമാക്കിയിരിക്കുന്നത്. ഇതേ സിനിമയുടെ ചിത്രീകരണത്തിനിടെ ഇതിന് മുന്‍പും വരുണ്‍ ധവാന് പരിക്കേറ്റിരുന്നു. സംവിധായകന്‍ അറ്റ്‌ലീ അവതരിപ്പിക്കുന്ന ചിത്രമാണ് വിഡി 18. 2024ല്‍ തിയേറ്ററുകളിലെത്തുന്ന ചിത്രം കലീസ് ആണ് സംവിധാനം ചെയ്യുന്നത്.

ഒരു മാസ് ആക്ഷന്‍ എന്‍റര്‍ടെയിനറായാണ് ചിത്രം ഒരുങ്ങുന്നത്. കീര്‍ത്തി സുരേഷും വാമിഖ ഗബ്ബിയുമാണ് ചിത്രത്തിലെ നായികമാര്‍. അതേസമയം, ‘ബവാല്‍’ എന്ന ചിത്രത്തിലായിരുന്നു വരുണ്‍ ഒടുവില്‍ അഭിനയിച്ചിട്ടുള്ളത്. ജാന്‍വി കപൂറിനൊപ്പം അഭിനയിച്ച ചിത്രത്തിന് മികച്ച പ്രതികരണമായിരുന്നില്ല ലഭിച്ചിരുന്നത്.

ആമസോണ്‍ പ്രൈമില്‍ ജൂലൈയിലാണ് ചിത്രം റിലീസ് ചെയ്തത്. ആദ്യം തിയേറ്ററില്‍ റിലീസ് ചെയ്യാനിരുന്ന ചിത്രം ആയിരുന്നെങ്കിലും റിലീസ് മാറ്റുകയായിരുന്നു. നിതീഷ് തിവാരി സംവിധാനം ചെയ്ത ചിത്രത്തിന് ഭാര്യ അശ്വിനി അയ്യര്‍ ആയിരുന്നു തിരക്കഥ ഒരുക്കിയിരുന്നത്.