മലയാള സിനിമയിലെ പ്രിയങ്കരനായ സംവിധായകനാണ് സിബി മലയില്‍. കിരീടം, ചെങ്കോല്‍, ദശരഥം, തനിയാവര്‍ത്തനം, കമലദളം, ആകാശദൂത് തുടങ്ങി മലയാളികളുടെ മനസ്സില്‍ എന്നും നിറഞ്ഞു നില്‍ക്കുന്ന സിനിമകള്‍ സമ്മാനിച്ചതും സിബിമലയിലാണ്. ഇപ്പോഴിതാ, അദ്ദേഹം മോഹന്‍ലാലിനെ കുറിച്ച് പറഞ്ഞ വാക്കുകളാണ് ശ്രദ്ധേയം.

സിനിമയില്‍ ഒരു കഥാപാത്രത്തെ കുറിച്ച് ആലോചിക്കുമ്പോള്‍ തന്റെ മനസ്സിലേക്ക് ആദ്യം വരുന്ന മുഖം മോഹന്‍ലാലിന്റേതാണെന്ന് സംവിധായകന്‍ സിബി മലയില്‍ പറയുന്നു. ഏത് കഥാപാത്രത്തിനും വഴങ്ങുന്ന അഭിനയവും ആകാരവുമാണ് മോഹന്‍ലാലിന്റേതെന്നും അദ്ദേഹം പറഞ്ഞു. കൗമുദി മൂവീസിന് നല്‍കിയ അഭിമുഖത്തിലാണ് അദ്ദേഹം ഇക്കാര്യങ്ങള്‍ പറഞ്ഞത്.

ഒരു സിനിമയെ കുറിച്ചുള്ള ചിന്ത വരുമ്പോള്‍ ആദ്യം ആരാണോ മനസില്‍ വരുന്നത് അവരെ വെച്ചായിരിക്കും ഞാന്‍ സിനിമ ചെയ്യുന്നത്. രണ്ട് പ്രധാന അഭിനേതാക്കള്‍ എന്ന നിലയില്‍ മോഹന്‍ലാലും മമ്മൂട്ടിയുമാണ് ആദ്യം മനസില്‍ വരുന്നത്. അതല്ലാതേയും മുരളിയെ വെച്ചോ മറ്റാരെങ്കിലേയും വെച്ചോ സിനിമകള്‍ ചെയ്യാറുണ്ട്.
പക്ഷെ ഒരു കഥാപാത്രത്തെ കുറിച്ച് ചിന്തിക്കുമ്പോള്‍ തന്റെ മനസിലേക്ക് ആദ്യം വരുന്ന മുഖം മോഹന്‍ലാലിന്റേതാണ്. കാരണം ഏത് കഥാപാത്രവും വഴങ്ങുന്ന ഒരു ആകാരമാണ് മോഹന്‍ലാലിനുള്ളത്. അദ്ദേഹത്തിന്റെ അഭിനയ രീതിയും അങ്ങനെ തന്നെയാണ്. അതുകൊണ്ട് തന്നെ പലപ്പോഴും ആദ്യം മനസില്‍ വരുന്ന മുഖം ലാലിന്റേതാണ്. സിബി മലയില്‍ വ്യക്തമാക്കി.

അത്‌പോലെ മെഗാസ്റ്റാര്‍ മമ്മൂട്ടിയെ കുറിച്ചും നടന്‍ മുരളിയെ കുറിച്ചും സിബി മലയിസല്‍ അഭിമുഖത്തില്‍ പറയുകയുണ്ടായി. മമ്മൂട്ടിക്ക് മാത്രം ചെയ്യാന്‍ പറ്റുന്ന കഥാപാത്രങ്ങള്‍ വരുമ്പോള്‍ വേറെ ആരെയും വിളിക്കാന്‍ പറ്റില്ല. തനിയാവര്‍ത്തനം പോലെ ഒരു സിനിമയിലേക്ക് മമ്മൂട്ടിയല്ലാതെ വേറെ ഒരു നടനെ നമുക്ക് ചിന്തിക്കാന്‍ കഴിയില്ല. അതുപോലെ തന്നെയാണ് ഓഗസ്റ്റ് പതിനഞ്ച് എന്നുപറയുന്ന സിനിമയും.

ഒരു കഥാപാത്രത്തിന്റെ രൂപം തിരക്കഥാകൃത്ത് തരുമ്പോഴാണ് ആ കഥാപാത്രം ആര് ചെയ്യണമെന്ന് തീരുമാനിക്കുന്നത്. ആകാശ ദൂദ് സിനിമയിലേക്ക് മുരളിയെ ആദ്യം തന്നെ ഞാന്‍ തീരുമാനിക്കുകയായിരുന്നു. എന്റെ ഏറ്റവും കൂടുതല്‍ സിനിമയില്‍ അഭിനയിച്ച ഒരാളാണ് മുരളി. ചെറുതും വലുതുമായ പല കഥാപാത്രങ്ങളിലും അദ്ദേഹം അഭിനയിച്ചിട്ടുണ്ട്. സിബി മലയില്‍ കൂട്ടിച്ചേര്‍ത്തു.