‘ കര്‍ഷകരാണ് രാജ്യത്തിന്റെ നട്ടെല്ല്’ ; ‘ലാത്തി’യുടെ ലാഭം കര്‍ഷകര്‍ക്ക്! പ്രഖ്യാപനവുമായി വിശാല്‍
വിശാലിനെ നായകനാക്കി വിനോദ് കുമാര്‍ സംവിധാനം ചെയ്യുന്ന പുതിയ ചിത്രമാണ് ലാത്തി ചാര്‍ജ്. വിനോദ് കുമാര്‍ തന്നെയാണ് ചിത്രത്തിന്റെ തിരക്കഥയെഴുതിയതും. ഒരു ആക്ഷന്‍ എന്റര്‍ടെയ്‌നര്‍ ആയിട്ടാണ് ചിത്രം പ്രേക്ഷകര്‍ക്ക് മുന്നില്‍ എത്തുക. ഈ മാസം 22ന് റിലീസ് പ്രഖ്യാപിച്ചിരിക്കുന്ന ചിത്രത്തില്‍ പോലീസ് ഉദ്യോഗസ്ഥനായിട്ട് ആണ് വിശാല്‍ എത്തുന്നത്. ചിത്രത്തിന് നേരത്തെ യു എ അംഗീകാരം ലഭിച്ചിരുന്നു. ഇപ്പോഴിതാ, റിലീസിന് ദിവസങ്ങള്‍ മാത്രം ബാക്കി നില്‍ക്കെ നടന്‍ വിശാല്‍ പുതിയൊരു പ്രഖ്യാപനവുമായി എത്തിയിരുക്കുകയാണ്.
തനിക്ക് സിനിമയില്‍ നിന്ന് ലഭിക്കുന്ന കളക്ഷന്റെ ഒരു ഭാഗം കര്‍ഷകര്‍ക്ക് നല്‍കുമെന്നാണ് നടന്റെ പ്രഖ്യാപനം. സിനിമയുടെ പ്രൊമോഷനുമായി ബന്ധപ്പെട്ട് നടന്ന ഒരു അഭിമുഖത്തിലാണ് ‘ലാത്തി’ ബോക്സ് ഓഫീസ് കളക്ഷന്റെ ഒരു ഭാഗം കര്‍ഷകര്‍ക്ക് സംഭാവന നല്‍കുമെന്ന് നടന്‍ അറിയിച്ചത്. കര്‍ഷകരാണ് രാജ്യത്തിന്റെ ഏറ്റവും വലിയ നട്ടെല്ലെന്നും അതിനാല്‍ അവരെ സഹായിക്കാന്‍ തീരുമാനിച്ചതായും വിശാല്‍ പറഞ്ഞു. എന്നാല്‍ ഇത് ആദ്യമായല്ല നടന്‍ വിശാല്‍ കര്‍ഷകര്‍ക്ക് പിന്തുണ നല്‍കുന്നത്. നടന്റെ ‘സണ്ടക്കോഴി 2’ല്‍ നിന്ന് ലഭിച്ച തുകയുടെ ഒരു ഭാഗം കര്‍ഷകസംഘത്തിന് നേരത്തെ നല്‍കിയത് വാര്‍ത്തയായിരുന്നു.
അതേസമയം, ‘ലാത്തി’യില്‍ വിശാലിനൊപ്പം സുനൈനയാണ് നായികയായി എത്തുന്നത്. ഒരു പോലീസ് ആക്ഷന്‍ ഡ്രാമയായാണ് ലാത്തി പ്രേക്ഷകരിലേക്ക് എത്തുന്നത്. നേരത്തെ പുറത്തിറങ്ങിയ ചിത്രത്തിന്റെ ട്രെയ്‌ലര്‍ പ്രേക്ഷകര്‍ക്ക് പ്രതീക്ഷ വര്‍ധിപ്പിക്കുന്നതാണ്.
ആക്ഷന്‍ ഹീറോയായ വിശാലിന്റെ മുപ്പത്തിരണ്ടാമത്തെ ചിത്രമാണ് ലാത്തി. അഞ്ചു ഭാഷകളിലായി പുറത്തിറങ്ങിയ ചിത്രത്തിന്റെ ടീസര്‍ ദശ ലക്ഷം കാഴ്ചക്കാരെ നേടിയിരുന്നു. സ്റ്റണ്ട് മാസ്റ്റര്‍ പീറ്റര്‍ ഹെയ്ന്‍ ഒരുക്കിയ സംഘട്ടന രംഗങ്ങളും പഞ്ച് ഡയലോഗുകളും കോര്‍ത്തിണക്കിയ ടീസര്‍ റിലീസ് ചെയ്ത മണിക്കൂറുകള്‍ക്കകം ആരാധകര്‍ ഏറ്റെടുത്തു. ഈ ചിത്രത്തില്‍ വിശാല്‍ എത്തുക ഒരു സാധാരണ കോണ്‍സ്റ്റബിളായിട്ടാണ്.
രമണയും നന്ദയും ചേര്‍ന്ന് നിര്‍മ്മിക്കുന്ന ചിത്രത്തിന്റെ ഛായാഗ്രാഹണം നിര്‍വഹിക്കുന്നത് ബാലസുബ്രഹ്മണ്യന്‍ ആണ്. എന്‍ ബി ശ്രീകാന്ത് ആണ് ചിത്രത്തിന്റെ എഡിറ്റിംഗ് നിര്‍വഹിക്കുന്നത്. ബാല ഗോപി ആണ് എക്‌സിക്യുട്ടീവ് പ്രൊഡ്യൂസര്‍. പിആര്‍ഒ ജോണ്‍സണ്‍ ആണ്. ചിത്രം തമിഴ്, മലയാളം, തെലുങ്ക്, കന്നട, ഹിന്ദി എന്നീ അഞ്ചു ഭാഷകളിലാണ് എത്തുന്നത്. മലയാളി നടന്‍ പി. എന്‍.സണ്ണി ശക്തമായ വില്ലന്‍ കഥാപാത്രത്തെ അവതരിപ്പിക്കുന്ന ചിത്രത്തില്‍ നടന്‍ പ്രഭുവും മുഖ്യ കഥാപാത്രത്തെ അവതരിപ്പിക്കുന്നു.
